Dit was liefde met eerste oogopslag vir Colette en Hechter en nog voor hy al met haar gepraat het, het hy reeds haar pa vir haar hand gevra. ʼn Troue in die Karoo was ʼn uitgemaakte saak vir die twee.
Ment en koraal was pragtige kleurmaats vir hulle plaastema troue. “Ons is altwee plaaskinders en lief vir die platteland. Die idee was om ʼn gemaklike, moderne vintage gevoel te skep.” Dit het hulle beslis reg gekry, gaste het eers die volgende oggend drie-uur huiswaarts gekeer! Boonop het hulle alles vir die troue self gedoen.
DAKNATMAAK MET ’N KINKEL
Colette en Hechter het saam ingetrek en tydens hulle dak natmaak partytjie het Hechter sy skaamheid trotseer en haar voor almal gevra om te trou. Elf maande later het hulle voor die kansel gestaan op ʼn dag toe die reën elke keer net op die regte tyd opgehou het.
WATTER RAAD HET JY VIR ANDER BRUIDE OOR DIE BEPLANNING VAN ’N TROUE?
“As jy besluit het op ʼn tema, moenie verder rondkyk nie. Begin ook eerder te vroeg beplan, dit stel mens gerus en dan kan mens seker wees jy kom by alles uit. Kry ʼn beplanningsboek wat jou help om niks te vergeet nie. Maak tyd vir mekaar in die beplanningstyd, dit is baie belangrik en probeer saam stem oor goed eerder as om heeltyd vas te sit oor klein dingetjies. Maar meeste van als, geniet dit en neem alles in, die tyd gaan so gou verby.”
WAT HET JULLE TROUDAG VIR JULLE SO BESONDERS GEMAAK?
“Ek het my sussie en drie beste vriendinne, wat so baie moeite gedoen het om die dag spesiaal te maak, heeltyd aan my sy gehad. My pragtige skoonsus was verantwoordelik vir die mooimaak van elkeen, en het sy haar uitstekend van haar taak gekwyt. As daar iets skeef geloop het, het ek definitief nie daarvan geweet nie, want my strooimeisies het als vir my uitgesorteer. Ons seremoniemeester was uitstekend en het snaakse en wyse woorde gespreek. My man se niggie, van Port Elizabeth, sing verskriklik mooi en het as ʼn verrassing tussen die mense opgestaan en vir ons Ek wil oud word saam met jou (van Juanita du Plessis) begin sing. Ek was so verras dat ek het skoon ʼn traan gestort het.”
WAT VIR ONS UITGESTAAN HET:
* Die sig-sag-patroon tafellopers op pragtige houttafels.
* Springmielie-gatsegeskenkies met ʼn pittige sêding.
* Pragtige lanterns as deel van die tafeldekor.
* Die besonderse kleur van die lug op die foto’s na die reën.
* Hul pragtige rustieke troukoek met rose.
DIENSVERSKAFFERS
Venue en drankies: Glen Allan
Spyseniering: Willa Botha
Blomme: Rose-Marie van Vuuren
Dekor: Self
Skryfbehoeftes: Prieska Internet Dienste
Troukoek: Nita van Zyl
Fotograaf: Zoomink
Musiek: Ruan van Heerden
Vermaak: Izak Scoltz
Trourok: Wedding connexion Bloemfontein
Hare en Grimering: Lyn-Marie Sandenbergh
Bruidegom se uitrusting: Stuttafords
Vervoer: Jaco van Zyl
Artikel: Yolande van Deventer
