Daar is soveel verskillende fotografiestyle om van te kies om jou troue vir altyd te verewig. Besluit vooraf wat jou keuse is en vind dan ’n geskikte fotograaf om dié styl en herinneringe vir julle vas te vang.
Soms is paartjies na hulle troue teleurgesteld in hulle foto’s… maar dit is heel moontlik nie omdat daar iets met die foto’s fout is nie, maar eerder omdat die fotograaf se styl nie by julle gepas het nie. Yolanda Wessels het met Lize du Toit van Lize du Toit Photography gesels oor die verskillende style. Maak die regte keuse vir julle.
TRADISIONEEL OF KLASSIEK
Dié styl word gekenmerk deur ’n baie formele benadering, tipies soos jou ouma en oupa se tipe troufoto’s. Die mense in die foto’s word gewoonlik voorgesê deur die fotograaf en in verskillende posisies geplaas.
KUNSTIG
Dié styl word gelei deur die individualisme van die fotograaf. Dit word gekenmerk deur die vermoë om ’n unieke reeks foto’s te skep. Dis kan wel riskant beskou word deur sommige bruide. Die enigste manier om te bepaal of hierdie styl by jou pas, is om deur ’n portfolio van die fotograaf te kyk.
KONTEMPORÊRE OF MODERNE TROUFOTOGRAFIE
Hierdie styl word gekenmerk deur ’n veel groter mate van informaliteit en ’n ontspanne benadering en gevoel deur die fotograaf. Dit kan lei tot spontaneïteit en die fotograaf kan die gees en pret van die dag vasvang, asook ’n paar van die meer formele elemente afneem. Daar is minder behoefte vir die fotograaf om in te gryp en dinge reg te stel. Dié styl is geneig om die uniekheid van jou groot dag vas te vang.
DOKUMENTÊRE STYL
Dit is ’n styl wat gekenmerk word deur ’n baie hands-off benadering deur die fotograaf. Hy sal die gebeure van die dag vasvang asof hy deel is van ’n dokumentêre TV-span en hoofsaaklik in die agtergrond vertoef. Daar word dus min geposeer of georganiseer om spesifieke foto’s te neem. Dis ’n baie gewilde styl, omdat dit hul vryheid van beweging toelaat.
Foto: Audrey Rose
