Troubeplanning is veeleisend, maar dit hoef nie tussen julle te kom nie. Maak tyd vir mekaar en gaan vir ’n romantiese piekniek om julle aandag weer vir ’n slag op mekaar te fokus.
Soms kan troubelainng heeltemal oorvat en voordat jy jou oë uitvee, is dit al waaroor julle kan praat. Vat ’n bietjie tyd af en maak seker julle kommunikeer nog met mekaar – oor iets anders as skoene, konfetti en ringe.
Hier is ’n lekker idee vir die lente, gaan hou piekniek by julle gunstelingpark of sommer agter in die erf op die gras. Net julle twee, die son en die lekker vars lentebriesie. Pak ’n mandjie met bederfkos in om die dag behoorlik te geniet. Omdat ons weet dat jy oor ’n paar maande in daardie rok moet inpas, is hier ’n paar gesonde slaairesepte wat heerlik sal werk vir julle pienkiek.
OPSIE 1: SPANSPEK-EN-GARNAALSLAAI
Al wat jy nodig het is…
Vir die slaai
Spanspek
10 medium-grootte garnale, gekook en ontdop (hou die stertjies aan vir die mooi)
Komkommer, papierdun gesny (gebruik ’n mandolien)
Seldery, dun gesny met die lengte langs Vars klapper, papierdun gesny (gebruik ’n mandolien)
Tatsoi-blare
Klein basiliekruidblaartjies
Klein mentblaartjies
Klein eetblare blomme
Vir die slaaisous
Sap van een lemmetjie
Skil van een lemmetjie, fyngekap
¾t Thaise vissous
¾t suiker
1t rysasyn
¼t sesam olie
1t vars koljander, gekap
1t vars basiliekruid, gekap
½t vars ment, gekap
Halwe medium-warm rooi rissie, ontpit en gekap
Maak dit so!
Meng die bestanddele vir die slaaisous en sit dit in ’n lugdigte houer. Sny die spanspek in stukke en verpak alles in lugdigte houers.
By die park: Rangskik die spanspek op ’n bord met die res van die slaaibestanddele. Skep die slaaisous oor en eet onmiddellik.
OPSIE 2: ’N VROLIKE, FRAAI LENTESLAAI
Al wat jy nodig het is…
1 pak gemengde slaaiblare (hierdie is ’n fraai, vroulike slaai, so gebruik verkieslik kleiner blare)
1 Engelse komkommer
2 wiele fetakaas
1 koppie mentblare
1 koppie bevrore ertjies
1 koppie breëbone (as jy nie breëbone kan kry nie, verdubbel eenvoudig die hoeveelheid ertjies)
2 sprietuie, fyngesny
3e goeie olyfolie
2e suurlemoensap
Knippie spout
Knippie growwe swartpeper
Maak dit so!
Gooi kookwater oor die bevrore ertjies en laat staan vir ’n minuut of twee om te ontvries. Dreineer en sit eenkant. Dop die breëbone uit hulle peule. Gooi kookwater oor die bone en laat staan vir 30 sekondes. Dreineer en trek dan die taai wit dop om elke boon af. Binne-in is ’n klein smarag wat proe soos lente. Sny linte komkommer al met die lengte van die komkommer langs (gebruik ’n groenteskiller).
Tuimel die slaaiblare, ertjies, breëbone, sprietuie, komkommer en mentblare (skeur in die helfte as hulle baie groot is) op ’n mooi, platterige slaaibord. Krummel die feta oor. Bedek met kleefplastiek. Meng die olyfolie, suurlemoen, sout en peper en verpak in ’n lugdigte houer. Gooi oor net voor julle eet.
Dan het julle natuurlik ook ’n ietsie soet nodig om die piekniek mee af te sluit. Bedien dit in kleiner porsies as jy bang is dat dit om die heupe gaan sit.
OPSIE 1: CADBURY SJOKOLADE-MOUSSE
Al wat jy nodig het is…
375ml vars room
4 eiergele
2 x 80g blokke Cadbury-melksjokolade
2 eierwitte
3e kakao
6e suiker
2t goeie brandewyn (sien ‘goed om te weet’ laer af vir alkohol-vrye opsies)
3e stérk espresso (of gebruik goeie kwaliteit kitskoffie soos Jacobs, gemeng met 3e water)
Maak dit so!
Breek die sjokolade in klein blokkies en smelt. Die maklikste manier om dit te doen, is om die sjokolade vir 20 sekondes op ’n keer in die mikro te blits. Roer dit na elke 20 sekondes, selfs al lyk dit nog solied. Hou aan met die 20-sekonde/roer storie tot die sjokolade gesmelt is.Plaas 175ml van die room, die eiergele, suiker en kakao in ’n hittevaste bak oor ’n pot kokende water. (Maak seker die bodem van die bak raak nie aan die water nie.) Verhit die mengsel stadig terwyl jy deurentyd klits. Dit van ’n hele rukkie so, tensy jy bultende armspiere het of wil hê, beveel ek aan jy gebruik ’n elektriese klitser. Hou aan klits tot die eier genoeg gekook het om die sous te verdik (so 7 minute). Verwyder van die hitte en roer die koffie, brandewyn en gesmelte sjokolade by.
Laat die mengsel afkoel. Jy kan dit sommer blitsvinnig doen deur die bak in ’n groter bak gevul met yswater en ysblokkies te sit. Klits of roer dit om te verseker die hele mengsel word aan die koue blootgestel en binne minute sal die mengsel yskoud wees. (Of jy kan die mengsel laat staan tot dit kamertemperatuur bereik het en dan in die yskas sit vir ’n uur.)
Klop die oorblywende room styf. (Wenk: Proe die sjokolade mengsel vóór jy die room klop. As dit nie soet genoeg is na jou smaak nie, kan jy strooisuiker na smaak by die room voeg wanneer jy dit klop.
Klop ook die eierwitte tot styf. Vou ’n derde van die geklopte room in die sjokolade mengsel in om dit bietjie losser te maak. Vou dan versigtig die orige room en eierwitte by om soveel as moontlik van die lug in te hou.
Skep die mengsel in klein botteltjies wat jy kan toeskroef en verkoel in die yskas vir ten minste vier ure voor jy bedien. Hierdie mousse sal vir 2-3 dae in die yskas hou.
OPSIE: 2 PEER-EN-SJOKOLADETERTJIES
Al wat jy nodig het is…
Blaardeeg (die deeg is die ster hier, so dis dit werd om effe meer te spandeer en behoorlike Blaardeeg gemaak met regte egte botter te koop. Woolworths se butter puff pastry is perfek)
3 pere Marsepein (marzipan)
3e botter, gesmelt
1e strooisuiker
3e appelkooskonfyt, gesmelt
70ml room
100g donkersjokolade
50g amandelvlokkies, gerooster versiersuiker, vir die mooi
Maak dit so!
Verhit jou oond tot 180 grade Celsius. Rooster die amandels in ’n pan of op ’n bakplaat in die oond tot goudbruin. Verwyder en hou eenkant. Sny agt sirkels uit die deeg (’n omgekeerde teekoppie maak dit makliker). Rol 8 klein balletjies van die marsepein (omtrent een teelepel marsepein per balletjie). Gebruik ’n koekroller om die balletjies plat te druk, hulle moet omtrent so groot soos ’n R5-stuk wees. (Sif bietjie versiersuiker oor die bord en koekroller om te keer dat hulle klou.) Sit een stukkie marsepein op elke deegsirkel.
Sny die pere in dun skywe en plaas ’n paar skywe op elke deegsirkel. So waaier-patroontjie is mooi. Verf die pere met botter en strooi ’n knippie strooisuiker oor elkeen. Bak op ’n kleefvrye bakplaat tot die deeg goudbruin en die pere sag is. Verf met gesmelte konfyt sodra hulle uit die oond kom. Strooi amandels oor en spuit sjokolade oor. Sif ’n bietjie versiersuiker oor en verpak in lugdigte houers.
Vir die sjokolade: Maak die sjokoladesous terwyl die tertjies in die oond is. Verhit eenvoudig die room in ’n pot op die stoof of in die mikro (moenie dit laat kook nie!). Breek nou die sjokolade in die room in. Die hitte sal dit laat smelt. Roer tot dit glad is. Vir ’n kits-spytsakkie, skep eenvoudig die sjokolade in ’n plastiek toebroodjiesakkie. Stoot alles in een hoek in, knip ’n klein gat in die hoekie en daar het hy dit.
Al die resepte is geneemvan Lizet Hartley se Melkkos-blog. Gaan like gerus haar blad om wonderlike idees en inspirasie te kry.
HET JY GEWEET?
Oulik verskaf die mooiste piekniekboksies vir twee. Alles wat jy kan nodig kry om jou piekniek mooi te maak, sal jy in hierdie boksie kry. Hulle is eksklusief te koop by die Tierlantynkies-mark aan die einde van September.
Hooffoto: Bride’s Story
