Minder was beslis meer met Michelle en Mauritz se troue by Moon & Sixpense. Michelle wou van die begin af ʼn troue sonder tierlantyntjies gehad het en warm aardse kleure, met skoon lyne, het alle fokus op die bruidspaar gehou.
LIEFDE OORWIN ALLES
Na twee jaar saam, moes Michelle na ʼn ander provinsie trek en het die druk van ʼn langafstand verhouding sy tol op die twee se verhouding geëis, maar nie op hulle harte nie. Hulle liefde het weer vlam gevat toe sy jare later terug trek en het op ʼn pragtige huweliksfees uitgeloop.
Hy is vir haar hierdie sagte reus wat haar unieke sin vir humor, empatie, ambisie en onlogiese probleemoplossing verstaan. Hoe sal mens nou sê- die liefde het beslis oorwin.
HOE HET JY BEGIN BEPLAN AAN DIE TROUE?
“Ek wou nog altyd ʼn eenvoudige, klein troue gehad het en het natuurlike kleure van bruin en wit met ʼn tikkie pienk gekies. Dit het romanties en gemaklik gevoel. Ons het by die tafellopers, skryfbehoeftes en blomme begin. Alles het aan die einde pragtig bymekaar gekom.”
EENVOUDIG SPESIAAL
Toe ons Michelle vrae oor wat vir haar spesiaal was op hulle groot dag, het sy geantwoord: “Alles was spesiaal. Die seremonie was kort-en-kragtig, die kos ongelooflik en ons almal het ʼn fantastiese tyd gehad.” Die meeste van die dekor het hulle self behartig. Haar ma het die tafellopers, servetringe, uitnodigings, fotorame sowel as die troukoek gemaak. Haar raad is eenvoudig: “Moenie oor die kleinighede kommer nie!”
WAT VIR ONS UITGESTAAN HET
* Die fortuinkoekies vir elke gas as geskenkie.
* Handvlaggies vir gaste om te waai in plaas van konfetti.
* Die koringare in die bruid en strooimeisie se handruiker.
* Weggooibare kameras op die gastetafels om herinneringe vas te vang.
DIENSVERSKAFFERS
Venue en spyseniering: Moon & Sixpence
Blomme: Alsmeer Florist
Troukoek, skryfbehoeftes en dekor: Ma van die bruid
Trourok: Crystal Brides (Ontwerper: Mori Lee)
Musiek: AMA Promotions
Fotograaf: Hello Love Photography
Grimering: Marelize van Wyk van MVW Professional Make Up
Bruidegom se uitrusting: The Dress Suit
Artikel: Yolande van Deventer
