Ilona en Eugene se troue, in elegante wit met kristal en silwer, het net weer bewys dat klassieke styl en skone eenvoud altyd tydloos sal bly.
Eugene se pa het die lodge, waar die tweetjies getroud is, spesiaal vir sy kinders se troues laat bou. Opgedollie in die mooiste wit linne, geborduurde organza en feetjieliggies, was dit ʼn bosveld troue van vyfster gehalte.
EENVOUDIG TREFFEND
Tafels is met die grootste sorg gedek. Die fynste kandelare, silwer eetware en kristalglase het bygedra tot die romantiese vars atmosfeer van die dag. Groot kerse met gipskruid kranse en roomkleurige rose het uitgestaan in hulle eenvoud. Bossies van dieselfde wit blom het elke tafel fyntjies versier, ʼn bewys dat minder beslis meer kan wees. Haar handruiker van net roomwit rose het mens se oog gevang.
FRAAIE PÊRELS
Elke deel van Ilona se rok het romanties gesê. Pêrels in haar hare, op die rok se bandjies en haar oorbelle het bygedra om ʼn verliefde en klassieke gevoel te skep. Dit is herhaal in die fyn pêrelversiering op die troukoek en kolwyntjies.
’N KONINKLIKE GEVOEL
Wie wil nou nie soos ʼn prinses op hulle troudag voel nie? Hierdie paartjie het beslis in koninklike styl die seremonie binnekom, op ʼn dik rooi tapyt. Hulle silwer hoë-rugleuning stoele, aan hulle onthaal tafel, met simmetriese gedekte lyne, het hulle beslis soos ʼn adelike paartjie laat vertoon.
’N ONTPLOFFING VAN VREUGDE
Behalwe vir die feit dat Arno Jordaan hulle openingsdanslied vir hulle gesing het, het ʼn reuse ontploffing van konfetti die vreugde van die oomblik vasgevang en die mooiste foto’s gemaak. Baie gepas vir ʼn paartjie wat oorborrel van lewenslus en lag.
SPESIALE OOMBLIKKE
Ilona het almal se hartsnare geroer met haar voorafopgeneemde troubeloftes, wat gespeel het terwyl sy aan die sy van haar stylvolgeklede ma, die paadjie afgestap het. ʼn Slim plan as jy bang is jou stem gaan te veel op die dag bewe.
Die twee sal verseker nooit moeg word om na hulle troufoto’s te kyk nie. Hulle het die hart van ʼn troue so suiwer vasgevang en dit kan beslis nooit uit die mode gaan nie.
DIENSVERSKAFFERS
Venue: Shiloh Crown Lodge
Dekor: Angie Pohl Venter
Skryfbehoeftes: By Cylie – Exquisite Bespoke Design
Fotograaf: Charl van der Merwe
Grimering: Louise Make- Up & Hairstylist
Hare: Eloise Redelinghuys
Trourok: Anel Botha Couture
Bruidegom se uitrusting: Eurosuit
Konfetti-ontploffing: Appétit Funtion Hire
Artikel: Yolande van Deventer
