Domenique en Eben is ʼn avontuurlistige paartjie wat ʼn klein boheemse troue, wat nie te tradisioneel moes voel nie, wou hê. Hulle het dit beslis reggekry en die eindresultaat was pragtig en baie romanties.
Die tweetjies was byna twee jaar verloof maar het eers twee maande voor die troue begin beplan! As julle gedink het so kort beplanning kan nie ʼn asemrowende resultaat lewer nie, dink weer. Hulle troudag was alles wat liefde sê: boheems, vol natuurlike blomme en ʼn prentjiemooi rok. (Wat nie eers by ʼn trouwinkel gekoop is nie!) “Ek kan nie die winkeltjie se naam onthou nie en dit was ook die eerste rok wat ek gesien het!”
Domenique som hulle ontspanne benadering mooi op: “Wees jouself en wees kreatief. Kies ook ʼn venue wat klaar mooi is, dit spaar jou baie geld en tyd.” Ons moes hulle eenvoudig net meer oor hulle verhouding en troudag gaan uitvra.
HOE HET JULLE LIEFDESVERHAAL BEGIN?
“Ek en my vriendin was op pad om kaartjies vir ’n konsert te koop toe ons Eben raakgeloop en my vriendin ons aan mekaar voorgestel het. Ons is toe saam na die konsert toe en het kort daarna saam op ʼn avontuur deur die Drakensberge en Kaapstad. Na dit was ons só dol verlief op mekaar dat ons onafskeidbaar was.”
WATTER EIENSKAPPE IS DIT WAT JULLE OP MEKAAR VERLIEF LAAT RAAK HET?
Domenique: “Eben het ’n pragtige hart en inspireer my om ’n die beste mens, wat ek kan wees te wees.”
Eben: “Domenique se vermoë om pret in enige situasie in te bring en haar avontuurlustige geaardheid.”
HOE HET HY JOU GEVRA OM TE TROU?
“In die strate van Parys net na middernag, op ’n koue aand met die Eiffeltoring in die agtergrond! Dit was só ʼn avontuur en ons het die beste tyd van ons lewe daar gehad!”
WATTER ATMOSFEER WOU JULLE GRAAG SKEP EN HOEKOM?
“Ons wou graag hê alles moes baie gemaklik en ontspanne wees en het wilde blomme gebruik om ’n natuurlike gevoel te skep.”
BESKRYF JUL TROUDAG?
“Ons het elke oomblik geniet. Dit was ’n ontspanne dag saam met ons naaste familie en vriende en die tuine van Shepstone Gardens het ook ’n baie mooi agtergrond geskep. Die wandelpaadjies het jou laat voel of jy in sprokieswêreld verlore is. Boonop het die rustige atmosfeer in die pragtige tuine dit maklik gemaak om elke oomblik ten volle in te neem.”
WAS DAAR ENIGE UNIEKE EN DOEN-DIT-SELF ASPEKTE BETROKKE BY JULLE TROUE?
“Ons geskenkies aan ons gaste was CD’s wat ook ons reise se roadtrip-musiek was! Die vere wat gebruik is, het ons gekry toe ons geld by ’n voëlpark geskenk het. My vriendinne het my gehelp met my grimering en blomme, wat baie spesiaal vir my was, en my hare was sommer net vinnig gekrul die oggend en toe vasgemaak vir meeste van die dag. Net so voor die diens het ek dit los gemaak. Ons het ook besluit om ook in die strate te gaan foto’s neem sodat ons ‘n paar unieke foto’s in ons trou album kon plaas.”
Hierdie troue is net weer ʼn bewys dat mooi en duur nie noodwendig hand-aan-hand hoef te gaan nie. Laat hulle avontuurlus jou aansteek om jou eie kop te volg.
DIENSVERSKAFFERS
Venue, koördinering, drankies, dekor en verhuring: Shepstone Gardens
Spyseniering: Secret Kitchen en Bells patisserie
Blomme: Bloomdesign
Skryfbehoeftes en musiek: Die Bruidspaar self
Fotograaf: Stroopsoet Fotografie
Hare: Carlton Hair International
Bruidegom se uitrusting: Country Road en Trennery
Vervoer: Bruidspaar se Beetle
Artikel: Yolande van Deventer
