Shelley en Clinton het ’n pragtige luilekker troue in Yzerfontein, by die Strandkombuis gehad. Dis die tipe paartjie wat hulle is, gemaklik en ontspanne. Die wit kleurskema, met spatsels blou en groen het perfek gepas.
Om ’n troue oor die langafstand te beplan, is ’n besonderse uitdaging, maar Shelley het dit soomloos gedoen. Die paartjie woon tans in die Verenigde Koninkryk maar het in Suid-Afrika getrou. “Ek het nog nooit die Weskus besoek nie en het die venue eers die dag voor die troue gesien. Die beplanning het baie ure se onbeperkte internet gekos!”
PARYS, DIE STAD VAN LIEFDE
Die twee het deur gemeenskaplike vriende ontmoet en was aanvanklik net eers goeie pêlle wat op die ou end saam oorsee opgeëindig het. Hier het die liefde begin blom, nadat hy haar onder sy vlerk geneem en touwys gemaak het in die vreemde gemaak. Sy het geweet hulle is vir mekaar bedoel tydens haar eerste Kersfees in Londen. “’n Mens voel maar aardig so alleen tydens Kersfees, vêr van jou familie en vriende af. Clinton het daaraan gedink en om dit spesiaal te maak en vir ons twee kaartjies Parys toe gekry vir die feestyd. Hy het gesê ons kan gaan as vriende of meer want in daardie stadium was ons verhouding nog nie amptelik nie, maar na Parys was ons onafskeidbaar!”
MEDITERREENSE EUFORIE
Shelley het dit reggekry om die kleurskema te laat insmelt by die venue en ’n Mediterreense vakansiegevoel straal uit hulle foto’s. “Ek dink dit is baie belangrik dat die dekor en kleurskema in harmonie met die venue moet wees, anders is dit soos om steak by ’n pizzaplek te gaan eet. Dit werk net nie.”
Alles het “Kom en ontspan saam met ons” gesê, van die vlaggies (wat haar kreatiewe ma gemaak het) tot die seegroen ombre troukoek en seesterre op die bruidegom se lapel en tafels. Moenie van die garnale en sjampanje vergeet nie!
ALLES-IN-EEN-IDEES HOU DIT MAKLIK EN EENVOUDIG
Die “administrasie” deel van die troue het Shelley en Clinton ook vereenvoudig deur ’n troubrosjure vir hulle gaste aanmekaar te sit. Dit het alles van die aanwysings en tafelplasings tot die dankies bevat, wat dinge heelwat meer vaartbelyn gemaak het.
DIE PERFEKTE DAG
Wat so uitstaan van hulle troue, is die vars onopgesmuktheid. Sy het die mooiste goue sandale gedra en skaars grimering aangehad (wat haar sagte eenvoudige wit rok pragtig gekomplementeer het.) Blomme in die hare en sorgeloos op die strand, saam met die liefde van haar lewe. Haar raad is net so kragtig en eenvoudig. “Dit is die beste 24 uur van jou lewe. Geniet dit!”
DIENSVERSKAFFERS
Venue, spyseniering en drankies: Strandkombuis
Koördineerder: Benita Thompson & Charmaine Osmond
Blomme: Neva Ward
Dekor: Moeder van die bruid
Skryfbehoeftes: Die bruidspaar
Troukoek: Edible Art Cakes
Fotograaf: Carien & Lize van Love of Light Photography
Videograaf/fotohoekie: Oliver Twist productions
Musiek: DJ Andy Hawes van DJ-Capes
Trourok: Davids Bridal, Londen
Hare: Natasha Duvenage
Grimering: Rebecca Phipson
Bruidegom se uitrusting: Topman, Londen
Artikel: Yolande van Deventer
