troukoors

elegante troue in swart en goud 1
Jonice en Wian wou ’n klein, intieme troue gehad het. ’n Stylvolle kombinasie van swart, goud en wit het ’n elegante tydlose atmosfeer geskep. Nie eers die koue wind kon die warmte van hulle dag bederf nie.

Die twee het ’n interessante aanloop tot hulle verhouding gehad. Jonice was veronderstel om ’n toe-oog-afspraak vir Wian met een van haar vriendinne te reël. Toe die vriendin twee ure voor die afspraak kanselleer, het die kuier heeltemal anders uitgedraai. Wian en Jonice het opgeëindig om mekaar se geselskap vir ure te geniet en liefde het ontluik.

HULLE LIEFDE SLAAG DIE TOER-TOETS
Een van die eienskappe van Wian wat Jonice beïndruk het, was sy liefde vir avontuur. Dit is dan nou juis hierdie avontuurlus wat hulle ’n toer na Botswana se Chobe toe laat doen het, waar Wian haar gevra het om te trou. “Hulle sê om jou liefde te toets, gaan toer saam want dit is wanneer jy jou maat sien vir wie hulle regtig is. Een aand laat, toe ons halfpad met ons toer was, onder die volmaan by die Chobe-rivier, het Wian die groot vraag gevra.”

’N DAG VOL LAG EN VREUGDE
Die twee is van Pretoria en het saam met veertig gaste in die Kaapse wynlande gaan trou. Op die dag was geeneen van hulle gespanne nie, selfs nie eers toe die koördineerder teen twaalfuur bel en sê die wind is te koud om die seremonie buite te hou en sy ’n ander plan gaan maak nie. “Ons sou die seremonie buite hou met ’n pragtige uitkyk oor Stellenbosch. Ek moes haar vertrou met haar oordeel en ons was verbaas met hoe mooi dit gelyk het op die einde.”

elegante troue in swart en goud 3

KLASSIEKE DETAIL
Wat vir ons besonders mooi was van hulle troue was die aandag aan eenvoudig maar treffende detail wat by die klassieke atmosfeer gepas het. Dinge soos die donker vye en swart rose op die troukoeke. Bessies in die waterbekers en kontrasterende swart glase op ryk wit tafeldoeke met goue onderborde, kerse en kersblakers. Selfs die troukar was baie elegant in sy swart en wit baadjie.

UNIEKE GESKENKE
Hulle het besluit om vir gaste geskenke die sketskunstenaar, Martinus van Tee, te kry om karikature van die paartjies te teken. Die gaste het dit baie geniet en dit is beslis uniek.

JONICE SE RAAD
“My raad aan ander bruide is beplan goed en hou dit intiem. Onthou om dit uniek te hou aan die bruidspaar se styl, die dag gaan oor julle liefde. Besluit watter detail vir julle belangrik is en doen moeite daarmee en bou volgens dit.”

elegante troue in swart en goud 4