Trouskryfbehoeftes is net so belangrik soos jou rok, venue en kos. Annika du Toit van Hestia Wedding Stationery gee raad oor hoe jy jou eerste trou-indrukke blywend kan maak.
Trouskryfbehoeftes kan net so ’n opwindende deel van jou troue vorm as trourok-aanpas en net so lekker wees soos troukoekproe! Dit is die eerste indruk wat gaste van die troue kry, so maak dit uniek!
GOEIE BEPLANNING
Goeie beplanning gaan vir jou meer tyd gee om jou kreatiewe idees lewe te gee. Om trouskryfbehoeftes te ontwerp is harde werk, en of jy en jou maat besluit het om dit self te doen en of julle ’n ontwerper gaan aanstel, maak seker daar is meer as genoeg tyd vir al julle ontwerpe. Begin een tot twee mande voor julle die Save the Date wil uitstuur.
KIES UNIEKE DENKE
Besluit op die ontwerpe wat julle wil hê en doen navorsing. Pinterest is ’n wonderlike plek om idees te kry, maar pas daardie idees aan om vir julle te werk. Om ’n ontwerp net so te kopieër onderdruk kreatiwiteit en is immers onwettig ook. Gebruik eerder ’n paar mooi voorbeelde as inspirasie vir ’n nuwe unieke ontwerp. Jy sal nie spyt wees nie!
WEES JULLE EIE INSPIRASIE
Gebruik invloede uit julle verhouding en lewens as ’n fokuspunt vir trouskryfbehoeftes. Hou julle daarvan om nuwe plekke te verken? Gebruik dan die landmerke van julle gunstellingbestemmings op plekaanwysers of tafelnommers. Miskien kan die eerste blomme wat hy vir jou gegee het pragtig lyk op uitnodigings. Julle troudag is tog daar om julle verhouding te vier en gaste sal mal wees daaroor om julle persoonlikhede in die dag raak te sien.
BALANS IS BELANGRIK
Dit is maklik om oorweldig te raak deur al die oulike idees! Vat tyd om deur julle idees te gaan en kies net dié wat julle die sterkste oor voel. Te veel idees op een ontwerp kan deurmekaar lyk en so verloor jou unieke skryfbehoeftes hulle trefkrag. Aan die ander kant wil mens ook nie oor en oor dieselfde ontwerp sien nie. Variasie van een ontwerp tot die volgende binne ’n oorhoofse tema kan jou trouskryfbehoeftes sommer nuwe lewe gee.
ONTMOET JOU ONTWERPER
Het jy en jou maat besluit om ’n trouskryfbehoefte-ontwerper te gebruik? Neem julle tyd om iemand te soek wat ’n sterk portefeulje het met ’n styl waarvan julle hou. Maak ’n afspraak en gaan drink saam met hulle ’n lekker koppie koffie. Maak ’n lysie van belangrike inligting om vir hulle te gee en moenie bang wees om eerlik te wees oor dit wat julle wil hê nie. Goeie ontwerp is ’n proses en daar is baie spanwerk betrokke.
’N IDEE OF TWEE
Hier is ’n paar praktiese idees vir unike uitnodigings:
* Vir kleurvol, maar stylvolle uitnodigings, hou die inligting eenvoudig en skoon en druk ’n kleurvolle partoon agterop die kaartjies.
* Gebruik ’n mooi vorm vir kaartjies. Ronde kaartjies of vintage-vorm kaartjies lyk mooi en om geld te spaar kan jy dit met die hand sny in plaas daarvan om lasersnywerk te laat doen.
* Kies ’n oulike ikoon en laat maak ’n trou-logo. Dit kan julle voorletters of selfs julle stokou Volkswagen Beetle wees. Gebruik dit spaarsamig op uitnodigings, tafeluitleg en geskenkies. Die logo kan selfs later in julle huis gebruik word.
Daar is geen perke aan dit wat julle as inspirasie kan gebruik nie. Laat julle skryfbehoeftes eie aan julle twee wees. As julle elegante smaak het gebruik dit, en as julle albei lekker laf is kan dit ook gebruik word! Gebruik hierdie geleentheid om julle troudag waarlik onvergeetlik te maak.
Foto’s: Verskaf
