Francois en Louise het verlief geraak van die eerste oomblik wat hy met haar kom gesels het en hulle het nog nie ’n dag terug gekyk nie. Hulle deel foto’s van hulle spesiale dag met ons.
WAAR ALLES BEGIN HET
“Ons is albei mal oor perdry en dit is juis tydens die beoefening van hierdie sportsoort wat ons ontmoet het. Alhoewel ons op daardie stadium van mekaar geweet het, het ons mekaar toe nog nie amptelik ontmoet nie. Daar was nie ’n romantiese eerste ontmoeting nie, maar toe hy die dag met my kom gesels, het ons dadelik verlief geraak. Ons het van die begin af geweet dat ons vir mekaar bedoel is, maar hy het eers besef dat hy met my wil trou die dag toe sy pa oorlede is. Hy het gesê dat hy my nooit wil verloor nie, want hy weet hoe maklik ’n mens iemand kan verloor vir wie jy lief is.”
DIE GROOT VRAAG
“Hy het my gevra om te trou tydens ’n romantiese naweek weg vir sy verjaardag. On is Kapama toe in Hoedspruit en het private wildritte, skemerkelkies en aandetes gehad. Dit was die mooiste plek wat ek nog ooit gesien het en ons is soos koninklikes behandel. Hy het die groot vraag gevra op die stoep van ons wittebroodsuite – op een knie – en ek het natuurlik ja gesê.”
DIE BEPLANNING
“Dit was maklik om die troue te beplan omdat ek van die begin af geweet het dat ek ’n romantiese, vintage troue wou hê. Daarom het ek sommer dadelik geweet toe ons die regte venue gekry het. Ek wou ’n baie elegante troue hê, met eenvoudige dekor… en dit is hoekom die venue perfek gewerk het. Die plek was so mooi dat dit baie min werk, moeite en dekor gevat het om ’n ongelooflike eindresultaat te skep. Die kleurskema was stofpienk en aardse steenkleure om ’n natuurlike, sagte en romatiese atmosfeer te skep. Ons wou graag hê dat almal die passie en liefde moes voel wat ons vir mekaar het. Dit was baie emosioneel. My raad is dat jy vooruit moet beplan en nie na te veel foto’s moet kyk nie, want dan gaan jy te veel van plan verander. Hou by dit wat van die begin af jou aandag getrek het.”
DIE MOOI DAG
“Ons troudag was baie spesiaal, want ons is saam deur so baie en almal wat daar was, het ons storie geken en ons emosies ervaar. Ons het gelag, ons het gehuil en almal het hulleself ook geniet – veral op die dansvloer. My ma en ’n vriendin het my gehelp om die troue te beplan en die versierings te doen en niks het skeefgeloop nie. Daar was wel ’n benoude oomblik toe my rok in die wiel van die donkiekar vasgehaak het. Maar ons het dit hanteer deur die donkies kalm te hou en die rok los te kry. My raad vir toekomstige bruide is beslis om kalm te bly op jou troudag. Klein goedjies loop altyd verkeerd en daar is niks wat jy daaraan kan doen nie. Geniet jou troue en neem alles in, want dit gaan so gou verby.”
DIENSVERSKAFFERS
Venue, spyseniering en drankies: Grin Court
Blomme en dekor: Anrule Plant and Décor Hire
Skryfbehoeftes: Selfgemaak
Fotograaf: Charl van der Merwe
Videograaf: Juan Buys
Musiek en vermaak: Derick de Lange; 071 689 7611
Trourok: Catherine’s Collection
Hare: Ronel by @Style Hair Salon; 083 496 6781
Grimering: Angelique Wentzel; 072 666 6398
Bruidegom se uitrusting: Hilton Weiner en Polo
