Baie paartjies betaal deesdae self vir hulle troue en beplan die geleentheid rondom hulle eie behoeftes en voorkeure. Soms is ʼn kreatiewe trou-uitnodiging nodig om die behoefte te verduidelik. Yolande van Deventer het raad.
Die dae van tradisionele troues, waar die bruid se ouers vir alles behalwe die drank betaal, is vinnig besig om uit te sterf. Ekonomiese druk, kultuurverskille en eie voorkeur speel al hoe meer ʼn belangriker rol in die reël van ʼn troue.
Hoe gemaak met jou trou-uitnodigings as jy ʼn ongewone versoek het? Soos om te vra vir geld in plaas van ʼn geskenk of selfs dat gaste vir hulle eie ete moet betaal? Ons het aan ʼn paar idees gedink om julle hiermee te help.
GELD IN PLAAS VAN GESKENKE
Alhoewel dit nie meer so ’n ongewone versoek is nie, kan dit tog vir party mense steeds moeilik wees om dit te vra. Bewoord die versoek dalk so in jou uitnodiging:
- ʼn Geldjie in die sak is beter as ʼn geskenkie op die rak.
- Ons spaarvarkie is ietwat leeg, ʼn geldjie sal beter as ʼn geskenkie deug
GEEN KINDERS
Dit is nie altyd net die paartjie wat geen kinders by die troue verkies nie, daar is ook trou-venues wat díe vereiste het. Miskien is dit naby ʼn rivier of in die berge wat ʼn gevaar vir klein bloedjies kan inhou. Dit kan egter vir ouers nogal ’n sensitiewe saak wees, so dit sal dalk help om die ys te breek as jy dit mooi bewoord. Sê ietsie soos:
- Kom deel in ons aandjie sonder ’n kleinding die handjie.
- Laat die kinders by ʼn maatjie gaan speel, terwyl julle in ons mooi dag kom deel.
GEEN EIE DRANK
Dit kan nogal ʼn aardige verleentheid raak as mense hulle koelerbokse na jou troue toe bring. Maak dus seker dat jy mense vooraf duidelikheid gee oor hoe die drank en die rekening werk. Miskien betaal julle tot op ʼn limiet en is dit vir elkeen se eie rekening daarna, of julle het ʼn kontantkroeg van die begin af. Hier is hoe jy dit kan sê:
- Wyn en vonkel het ons gekonkel, maar vir hardehout soek hulle kontant in die hand.
- Wyn voorsien saam met die spyse, los maar die koelerbokse by die huise.
GASTE BETAAL VIR HULLE EIE ETE
Dit mag dalk met die eerste oogopslag verregaande klink, maar trou is geen goedkoop saak nie. Dit is ʼn teerpuntjie om vir gaste te betaal wat nie opdaag nie. Al hoe meer mense begin troues op so ’n manier reël, dat die seremonie ʼn deftige geleentheid, met ʼn drankie en ligte versnappering daarby, terwyl die onthaal dan in die vorm van ʼn bring-en-braai of ʼn ete by ʼn gesellige restaurant, waar elkeen vir sy eie rekening betaal, gehou word. Sodoende daag net die mense wat regtig daar wil wees op.
Jou uitnodiging kan dalk lees:
- Snoeperye word by die seremonie voorsien, maar die ete by die onthaal word uit jou beursie bedien.
- Ons onthaal is informeel, daarom moet jy self kos reël.
Julle troudag is kosbaar en moet inpas by dit wat vir julle as paartjie belangrik is. Moenie dat familietradisies druk op julle sit oor hoe dinge gedoen moet word nie. Skep julle eie unieke tradisie, wie weet, julle vat dalk die voortou in ʼn hele nuwe styl van trou!
