Jou seremoniemeester hou baie van die leisels van julle trou-wa vas op die dag en kan ʼn meester in die taak wees, of uitdraai as ʼn seremoniemonster. Kies dus versigtig.
ʼn Seremoniemeester is nie net die persoon wat die gapings tussen die toesprake met grappies vul nie. Dit is ook die persoon wat gaste laat welkom voel, onvoorsiene hekkies oorseil en die dag soos ʼn goedbeplande produksie laat verloop. Kortom, die seremoniemeerster het ʼn reuse verantwoordelikheid en jou keuse moet betroubaar wees en flink op die plek kan dink.
Daar is die opsie om ʼn professionele seremoniemeester te huur, maar die meeste paartjies verkies steeds om ʼn nabye familievriend of die hoof-strooijonker te vra. Só voeg dit ʼn meer persoonlike en intieme gevoel tot die troue en hoor jy nie dieselfde teksboek grappies oor en oor nie.
HOE GAAN JY TE WERK OM DIE REGTE PERSOON VIR DIE DAG TE KIES?
Vra julleself die volgende vyf vrae met die keuringsproses af:
- WATTER ATMOSFEER WIL ONS MET DIE TROUE SKEP?
Dit help nie om vir Kosie die plaatjie, met sy kampvuur grappies, in die vriendekring te vra as jy ʼn elegante atmosfeer wil skep nie. Boonop kan die persoon dalk goed wees tussen ʼn groot groep mense in ʼn informele omgewing maar kry nie piep uit as hy alleen met die mikrofoon staan nie.
- WATTER TIPE GASTE IS TEENWOORDIG BY DIE TROUE?
Almal op julle troue is vir julle lief en dierbaar, maar hulle kom tog uit verkillende wêrelde. (Iets wat jou tafelplasings gou onder jou aandag bring.) Kry die grootste gemeenskaplike faktor en kyk of het die persoon wat jy ingedagte het, die persoonlikheid het om díe gehoor te kan lees en hanteer. (Dit is ook baie belangrik om die tipe agtergrond vir julle keuse te gee.) Moenie vir Sarel die boer loslaat op ʼn klomp professore en doktore nie, hulle waardeer dalk nie sy sin vir humor te veel nie.
- WAT GAAN DIE VOERTAAL VIR DIE DAG WEES?
In ons kosmopolitaanse sosiale lewe van vandag, het die meeste van ons vriende wat ʼn ander taal ook praat. Partykeer is hulle in die minderheid, maar verstaan glad nie jou huistaal nie en kan jy hulle baie uit laat voel as jy in ʼn taal kommunikeer wat hulle nie verstaan nie. Maak dus seker jou seremoniemeerster is vlot in die voertaal vir die seremonie. Sarie se geratbraakte Engels kan dalk haar sin vir humor kniehalter en julle atmosfeer in duie laat stort.
- WATTER VERANTWOORDELIKHEDE WIL ONS VIR DIE SEREMONIEMEERSTER GEE?
Hoe baie leisels julle vir die persoon gaan gee, is in julle hande. Maak seker dat die persoon wat julle kies julle trouplan verstaan, presies weet wat julle van hom/haar verwag en dat die persoon die druk van die dag kan dra sodat julle kan ontspan. Dit gaan nie help jy vra vir Fanie om die gaste betyds te laat in die saal gaan as hy self nooit betyds vir enige iets opdaag nie, al is hoe goeie publieke spreker.
- KEN DIE PERSOON JULLE ALTWEE EN ALBEI SE FAMILIES REDELIK GOED?
Dit is wys om iemand te kies wat ʼn gemeenskaplike vriend is en iemand wat al bietjie met beide families te doen gehad het. Dit gee diepte en egtheid aan staaltjies en maak dit ook makliker vir die seremoniemeester om nie per ongeluk op tone te trap nie.
As julle die moontlike kandidate deur die vraelys gesit het en ʼn kortlys gemaak het, is dit dalk ʼn goeie idee om hulle ʼn proeflopie te gee by ʼn die kombuistee of rampartytjie of selfs ʼn groot voor-die-troue-familie-ete, as jy so bevoorreg is. So kan jy sien of julle dalk iemand anders moet kies.
Artikel: Yolande van Deventer
