Elke bruid wil graag daai ekstra vetjies afskud voor haar troudag, maar is nie lus vir die vervelige kos wat daarmee saamgaan nie. Die 7de laan-kookboek is vol heerlike resepte wat dit maklik sal maak om gesond te eet.
Om ’n troue te beplan kan nogal ’n stresvolle affêre wees en vir baie bruide is dit ook ’n emosionele tyd – wat nie goeie nuus is as jy ’n emosionele eter is nie. Buiten vir al die reëlings, is om jou doelgewig te bereik seker een van die grootste uitdagings voor die groot dag – veral wanneer jy lus is vir sjokolade en vervelige kosse moet eet wat nie jou of jou smaakkliere laat opgewonde voel nie.
Maar dit hoef nie so te wees nie, want daar is heerlike resepte daar buite wat gesond is en jou sal help om van oortollige gewig ontslae te raak. Die karakters in die gewilde sepie, 7de laan, moet altyd op hulle beste lyk en dit is daarom nie snaaks om gesonde resepte in hulle nuutste kookboek, 7de laan vier fees, raak te loop nie. Probeer gerus hierdie heerlike slaai wanneer jy jou strooimeisies oornooi vir middagete.
AARBEI-EN-BRIESLAAI
Genoeg vir 4 tot 6 porsies
BESTANDDELE
SLAAISOUS
45ml (3e) olyfolie
15ml (1e) balsamiese asyn
5ml (1t) dijon-mosterd
2,5ml (1⁄2t) strooisuiker
5ml (1t) swartpeper
2,5ml (1⁄2t) sout
SLAAI
70g (2 hande vol) baba-spinasieblare
250–300g aarbeie, goed gewas
125g brie, in skyfies gesny
125ml (1⁄2k) amandelvlokkies gerooster
Grofgemaalde swartpeper na smaak
METODE
SLAAISOUS
- Voeg al die bestanddele bymekaar en meng goed. Proe die sous en pas die smaak aan na gelang van jou voorkeur.
SLAAI
- Pak die baba-spinasieblare mooi op ’n groot opdienbord. Strooi die aarbeie oor (halveer dié wat te groot lyk). Pak die skyfies brie mooi op die slaai en strooi die amandels oor.
- Aarbeie is baie lief vir varsgemaalde swartpeper. Wees dus, afhangende van jou gaste se smaak, redelik rojaal daarmee oor die slaai.
- Sit die slaai voor met die slaaisous wat in ’n mooi bekertjie gegooi is sodat almal self sous oor hulle slaai kan gooi. Hierdie slaai is net so lekker sonder die slaaisous.
WENK
Om die slaaisous vinnig te maak, sit al die bestanddele in ’n bottel met ’n skroefdeksel, draai die deksel dig toe en skud die bottel goed. Dit verseker dat die slaaisous goed gemeng is, en dit mors minder.
Die boek is beskikbaar by jou naaste boekwinkel. Vir meer inligting besoek Human & Rousseau se webblad.
