Pasgetroude paartjies begin dikwels hulle lewens saam in ’n woonstel of meenthuis met beperkte kasspasie. Vermy onnodige konflik met manlief deur van die begin af jou klerekas perfek te beplan sodat alles netjies pas.
Trou en trek kan vir ’n pasgetroude paartjie ’n baie emosionele en stresvolle saak wees… wat vererger kan word wanneer julle goed nie alles in julle nuwe nessie pas nie. Een manier om seker te maak dat julle huwelik op ’n hoë noot afskop, is om te sorg dat jou klerekas (wat maar met ’n paar nuwe ek-is-nou-’n-mevrou-uitrustings mag spog) goed beplan en georganiseerd is, sodat manlief ook ’n plekkie het om sy goed te pak.
Deeglike klerekasbeplanning is dus noodsaaklik. Voor jy begin beplan, beskou eers jou klerekas krities. Gooi alles uit wat nie meer pas nie (ja al daardie kledingstukke wat jy hou totdat jy eendag weer in hulle sal pas!), waarvan jy nie hou of in goed voel nie. Dit maak dan weer plek vir ’n paar nuwe goedjies waarvoor hy sal mal wees.
MAAK SEKER DAT JOU NUWE UITRUSTINGS AAN DIE VOLGENDE KRITERIA VOLDOEN:
* Vlei die kleur jou? Maak seker jy weet in watter kleure jy goed lyk en hou streng daarby.
* Vlei die snit jou? Skinny fits vlei nie elke figuurtipe nie, veral nie peervormiges nie.
* Pas die stuk wat jy wil aankoop by ten minste twee of drie ander stukke wat reeds in jou kas is? As jy niks het om daarby aan te trek nie, gaan dit nie jou uitrustings meer maak nie.
* Kan jy dit formeel of informeel maak deur middel van bykomstighede? (Kan jy dus ’n dagrokkie omskep in ’n oulike aandnommertjie met ’n handsakkie en ander skoene…)
KLEURE
Hou jou basiskledingstukke se kleur binne die grense van drie kleure wat mekaar asook jou gelaat komplementeer. (Dink ’n bietjie watter kleur meestal vir jou komplimente laat inrol.) Meng en pas nou binne daardie kleure en kleurkombinasies. Wanneer jy iets nuut aankoop, koop binne daardie skakerings.
STYL
Besluit op ’n styl wat by jou leefstyl pas en wat aanpasbaar is by die veranderende aktiwiteite in jou leefstyl. Hou in gedagte of jy ’n sportiewe en aktiewe leefstyl het of is jy meer klassiek, romanties of kunssinnig? Belê in bykomstighede wat by jou styl pas.
BYKOMSTIGHEDE
Serpe kan maklik te warm raak in die somer en krale is nie almal se keuse nie. Stapel-armbande kan dalk jou stempel word.
MAATS WAT PAS
Jy moet drie bostukke vir elke broek of romp hê. Brei die bostukke uit met ligte truitjies in dieper skakerings as die somerhempie of -toppie. Ligte denim- of katoenbaadjies in pastelkleure rek ’n somerskas eindeloos. Hou jou voorkoms vars en fleurig sonder te veel fieterjasies. Hou dit speels, selfs by die werk sonder om professionaliteit in te boet. Pastelkleure is groot nuus, maar jy wil nie soos ’n roomys lyk nie. Vermy ’n matchy-match voorkoms. Skoene, handsakke en belde hoef lankal nie meer dieselfde kleur te wees nie. Probeer om twee kleure op ’n slag in een uitrusting te kombineer en gebruik dan ’n serp, krale, gordel en armband in ’n derde kleur.
Laastens, koop stukke wat sal hou – let op die kwaliteit. Moenie die mode so slaafs volg dat jy niks van jou nuwe aankope volgende somer kan gebruik nie.
Artikel: Yolanda Wessels en Annamarie Uys
