’n Troue is altyd vir die bruid en bruidegom die lekkerste dag van hulle lewe. Daar is natuurlik nie vir hulle ’n vervelige oomblik nie, want soveel opwindende goed moet gebeur. Maar jou gaste voel dalk anders.
’n Bruid en bruidegom se troue is gewoonlik vir hulle vol opwinding – van die seremonie, eerste dans en foto’s tot die onthaal en toesprake. Die dag gaan vir hulle in ’n oogwink verby.
Ongelukkig is die gaste nie so bevoorreg nie en mag die normale trouformaliteite vir hulle ’n bietjie afgesaag raak. Gebruik hierdie wenke om te verseker dat jou gaste nie vroeg huis toe gaan nie.
1. SIT MENSE WAT MEKAAR KEN, BY MEKAAR
Jy het al immers saam met almal wat by jou troue gaan wees gekuier. Sit mense wat mekaar ken of wat jy weet baie goed oor die weg sal kom by mekaar. Moenie die tannies wat mekaar haat by dieselfde tafel sit net omdat hulle familie is nie.
2. KUIER, KUIER EN KUIER
Reël ’n braai en nooi mense wat by die troue gaan wees, maar nog nie ontmoet het nie oor vir ’n kuier. Dit sal die ys breek en solank vir hulle iets gee om oor te praat.
3. HOU BY JOU TROUDAG-SKEDULE
Nee jy hoef nie ’n skeidsregter met ’n fluitjie te reël om almal op skedule te hou nie, maar hou dit tog in gedagte wanneer jy foto’s neem. Wat verwag jy moet jou gaste doen as jy vir twee ure lank foto’s neem? Gee almal wat heildronke instel vyf minute en vra hulle om by daardie tyd te hou, niemand wil vir 20 minute lank hoor hoe oom Kosie jou doeke omgeruil het en nou nie kan glo dat jy getroud is nie. Gee vir almal raamwerke en probeer om min of meer daarin te bly.
WENK: Om tyd te spaar, vra jou fotograaf om jou ’n week voor die troue by julle venue te kry en soek dan plekke uit waar julle graag fotosessies wil doen. Dan kan julle lekker rustig soek en mooi bepaal waar julle oorals heen moet gaan.
4. DINK AAN JOU GASTE
Kry goedjies vir jou gaste om te doen soos ’n photobooth, Jenga, rolbal of enige ander speletjies wat hulle saam kan speel. Maak jou gasteboek ook prettig sodat almal daarin kan teken. Dit sal jou gaste, wat nie dans nie, ook help om besig te bly. Die maklikste manier om jou gaste tydens jou troufotosessie besig te hou is deur om vir hulle kos en iets te drinke te gee. Dit is nou hoogmode om peuselhappies te te bedien tewyl julle foto’s neem. Mense wat eet is altyd gelukkig!
5. REËL VERVOER
Dit is in vandag se tyd so gerieflik dat jy iemand kan kry om jou huistoe te vat as jy een te veel gehad het om te drink. Reël vir jou gaste pendelbussies om hulle van jou venue na hulle verblyf te vervoer. Dit verseker dat jy daardie aand kan slaap sonder om jou te bekommer oor die nefie wat altyd te veel drink.
6. EERSTE EEN IS OP ONS
’n Kontantkroeg is altyd ’n goeie idee, nie net help dit gaste om nie so baie te drink nie, maar dit hou ook julle spaarvarkie heel. Maar ek wil julle tog aanmoedig om die eerste drankie op julle te vat. Laat die kroeg ’n rekening oopmaak tot by ’n sekere bedrag of bedien hierdie eerste drankie saam met daardie peuselhappies. Dit sal die gaste laat afkoel en help om die senuwees bietjie te laat bedaar.
7. VERMAAK JOU GASTE
Jy kry deesdae soveel verskillende tipes vermaak van towenaars, belly dancers tot singende kelners ensovoorts. Hierdie mense maak gewoonlik jou gaste deel voel van hulle toertjie en dit help jou almal om te ontspan, te lag en lekker saam te speel.
8. KOS
Die ou buffet-etes is uit en daar is soveel variasies wat jy kan doen, vir nagereg dink daaraan om ’n roomyshoekie te hê of huur ’n kostrokkie wat oliebolle bedien waar die mense dit self kan versier. Dit is altyd prettig om nagereg so ’n bietjie op te kikker.
Op die ou einde van die dag kan jy ook net soveel doen en sal daar altyd mense wees wat kla oor iets wat nie volgens hulle smaak was nie. As jy hierdie agt wenke volg, weet jy ten minste dat jy jou bes probeer het om dit vir almal lekker te maak.
Artikel: Christell du Preez van The Peachy Peony
